ന്യൂട്ടനും ഐന്‍സ്റ്റീനുമൊക്കെ എന്ത്? മോദിയുടെ വാലില്‍ കെട്ടാനാവുമോ? ഇന്ത്യന്‍ ഗവേഷകന്‍

ന്യൂട്ടന് ഭൂഗുരുത്വാകര്‍ഷണബലത്തെ കുറിച്ച് വലിയ ധാരണയൊന്നുമില്ലായിരുന്നു. ഗുരുത്വവുമായി ബന്ധപ്പെട്ട പല കാര്യങ്ങളും അദ്ദേഹത്തിന് മനസ്സിലാക്കാനായില്ല, വിശദീകരിക്കാനും കഴിഞ്ഞിട്ടില്ല- ശാസ്ത്രത്തെ മാറ്റിമറിക്കുമെന്ന് മോദി ഭക്തനായ ഗവേഷകന്‍

ന്യൂട്ടനും ഐന്‍സ്റ്റീനുമൊക്കെ എന്ത്? മോദിയുടെ വാലില്‍ കെട്ടാനാവുമോ?  ഇന്ത്യന്‍ ഗവേഷകന്‍

കെ ജെ കൃഷ്ണന്‍ തന്റെ സിദ്ധാന്തങ്ങള്‍ ഒരിക്കല്‍ അവതരിപ്പിക്കുകയും ലോകം അത് അംഗീകരിക്കുകയും ചെയ്താല്‍ ന്യൂട്ടനും ഐന്‍സ്റ്റീനും ഒരു മൂലക്കിരിക്കും. അക്കാര്യം ഉറപ്പാണ് അഡയാറിലെ വേള്‍ഡ് കമ്യൂണിറ്റി സര്‍വീസ് സെന്ററിലെ സീനിയര്‍ ഗവേഷകനായ കെ ജെ കൃഷ്ണന്. ജലന്ധറില്‍ നടക്കുന്ന നൂറ്റിയാറാമത് സയന്‍സ് കോണ്‍ഗ്രസിലാണ് കൃഷ്ണന്‍ ഈ വെളിപ്പെടുത്തല്‍ നടത്തിയത്. ഐന്‍സ്റ്റീനെ കുറിച്ച് ഒരു പേപ്പര്‍ അവതരിപ്പിക്കുകയായിരുന്നു അദ്ദേഹം.

ന്യൂട്ടനെ കുറിച്ചും അദ്ദേഹത്തിന് സുചിന്തിതമായ അഭിപ്രായങ്ങളുണ്ട്. ന്യൂട്ടന് ഭൂഗുരുത്വാകര്‍ഷണബലത്തെ കുറിച്ച് വലിയ ധാരണയൊന്നുമില്ലായിരുന്നു. ഗുരുത്വവുമായി ബന്ധപ്പെട്ട പല കാര്യങ്ങളും അദ്ദേഹത്തിന് മനസ്സിലാക്കാനായില്ല, വിശദീകരിക്കാനും കഴിഞ്ഞിട്ടില്ല. അദ്ദേഹത്തിന്റെ കണക്കുകൂട്ടലുകളില്‍ വലിയ തെറ്റില്ലെന്നാണ് കൃഷ്ണന്റെ അഭിപ്രായം പക്ഷേ, പാളിയത് സിദ്ധാന്തത്തിലാണ്. ഇക്കാര്യത്തില്‍ ന്യൂട്ടന്‍ മാത്രമല്ല, ഐന്‍സ്റ്റീന്റെ കാര്യവും കണക്കാണ്. അദ്ദേഹത്തിനും സൈദ്ധാന്തിക ഭൗതികത്തില്‍ വേണ്ട അവഗാഹമില്ലായിരുന്നു. മാത്രമല്ല, ആപേക്ഷികസിദ്ധാന്തത്തിലൂടെ ലോകത്തെ തെറ്റിദ്ധരിപ്പിക്കുകയും ചെയ്തു.

കൃഷ്ണന്റെ സിദ്ധാനതമനുസരിച്ച് ലോകം സഞ്ചരിച്ചുകൊണ്ടിരിക്കുന്നതിനു കാരണം ഗുരുത്വമല്ല, മറിച്ച് സ്ഥലത്തിന്റെ സ്വയം ചുരുങ്ങാനുള്ള പ്രവണത കൊണ്ടാണ്. സൂര്യനും മറ്റു ഗോളങ്ങളും ഒക്കെ അടങ്ങുന്ന ഗ്രഹങ്ങള്‍ സ്ഥലത്തെ അപേക്ഷിച്ച് ചെറുതാണ്. സ്ഥലത്തിന്റെ മുഖ്യ പ്രവണത സ്വയം ചുരുങ്ങലാണല്ലോ. ആ 'സ്വയം ചുരുങ്ങല്‍ ബലം' സ്ഥലത്തിലുള്ള ഗ്രഹങ്ങളെയും ബാധിക്കും. അവ സമ്മര്‍ദ്ദത്തിലാവും. ഈ സമ്മര്‍ദ്ദമാണ് വസ്തുക്കളുടെ ചലനത്തിനു ഹേതു. ഇതൊന്നും മനസ്സിലാക്കാന്‍ ഐന്‍സ്റ്റീനും ന്യൂട്ടനും കഴിഞ്ഞില്ലെന്ന് കൃഷ്ണന്‍ പറയുന്നു. തന്റെ സിദ്ധാന്തം സ്റ്റീഫന്‍ ഹോക്കിന്‍സുമായി പങ്കുവച്ചിരുന്നതായും കൃഷ്ണന്‍ പറയുന്നുണ്ട്.

ശാസ്ത്ര സാങ്കേതിക വകുപ്പു മന്ത്രി ഹര്‍ഷ് വര്‍ധന്‍ എപിജെ അബ്ദുല്‍കലാമിനേക്കാള്‍ മികവുള്ള ആളാണെന്ന അഭിപ്രായവും കൃഷ്ണനുണ്ട്.

കാലാവസ്ഥാ മാറ്റത്തെയും ഭൂഗുരുത്വവുമായി അതിനുള്ള ബന്ധത്തെയും കൃഷ്ണന്‍ ചോദ്യം ചെയ്യുന്നു. ഗുരുത്വമുണ്ടാവുമായിരുന്നെങ്കില്‍ മഞ്ഞുപാളി ഉരുകി പുറത്തുവരുന്ന അധിക ജലം ഭൂമിയില്‍ കെട്ടിനില്‍ക്കുമായിരുന്നോ, അവ ഭൂമിയിലേക്ക് ഊര്‍ന്നുപോവുമായിരുന്നില്ലേ? കൃഷ്ണന്‍ ചോദിക്കുന്നു. ഗുരുത്വതരംഗത്തെ മോദി തരംഗമെന്ന് പേരുവിളിക്കാനൊരുങ്ങുകയാണ് ശ്രീ കൃഷ്ണന്‍. അങ്ങനെയാണെങ്കില്‍ മോദി പ്രഭാവം രാഷ്ട്രീയത്തില്‍ മാത്രമല്ല, ശാസ്ത്രത്തിലും വാര്‍ത്തകള്‍ സൃഷ്ടിച്ചേക്കും.