കാവല്‍ക്കാരനും മോഷ്ടാക്കളും

പ്രധാനമന്ത്രിക്കു നേരെയുള്ള ചോദ്യങ്ങൾ കൂടുതൽ വ്യാപകമാകാൻ പോകുന്നു. ഔദ്യോഗിക രഹസ്യനിയമം അനുസരിച്ച് കേസ് എടുത്തതുകൊണ്ടോ ദേശസ്‌നേഹം സ്വന്തം കുത്തകയായി ഉയർത്തിക്കാണിച്ചതു കൊണ്ടോ ചോദ്യങ്ങളെ തടയാനാവില്ല. റഫാൽ കേസിലെ പുനഃപരിശോധനാ ഹർജി അടുത്തയാഴ്ച വീണ്ടും സുപ്രിം കോടതിയിൽ വാദത്തിന് വരും. പ്രധാനമന്ത്രി മോദിതന്നെ ഇപ്പോൾ കടന്നാക്രമണത്തിൽനിന്ന് പ്രതിരോധത്തിലേക്കു പിന്മാറിത്തുടങ്ങി

കാവല്‍ക്കാരനും   മോഷ്ടാക്കളും

അപ്പുക്കുട്ടൻ വള്ളിക്കുന്ന്

പ്രതിപക്ഷത്തെ തകർത്ത് വീണ്ടും അധികാരത്തിൽ തിരിച്ചുവരാൻ പ്രധാനമന്ത്രി മോദി കരുതിവെച്ച രണ്ടു രാഷ്ട്രീയായുധങ്ങളും കൈവിട്ടുപോകുന്നു. പാക് അതിർത്തി കടന്ന് ഭീകരത്താവളത്തിനെതിരെ ബാലാക്കോട്ട് നടത്തിയ മിന്നലാക്രമണം പ്രധാനമന്ത്രിക്കും ബി.ജെ.പിക്കും ഇപ്പോൾ തിരിച്ചടിയാകുന്നു. റഫാൽ ഇടപാടിൽ പ്രതിരോധ മന്ത്രാലയത്തിലെ ഔദ്യോഗിക രേഖകൾ 'മോഷണം'പോയെന്നു സുപ്രിം കോടതിയിൽ അറ്റോർണി ജനറൽ നടത്തിയ വെളിപ്പെടുത്തൽ പ്രധാനമന്ത്രിയുടെയും ഗവണ്മെന്റിന്റെയും വിശ്വാസ്യതയെ ചോദ്യംചെയ്യുന്നു. രണ്ടും തെരഞ്ഞെടുപ്പിൽ മോദിക്കെതിരായ രാഷ്ട്രീയ ആയുധമാകുന്നു.

2014ൽ ലോക്്സഭാ തെരഞ്ഞെടുപ്പ് പ്രഖ്യാപിച്ചത് മാർച്ച് അഞ്ചിന് ആയിരുന്നു. ഇത്തവണ അത് 10 ന് ആയി. പതിനൊന്നാം മണിക്കൂറിലും പുതിയ പദ്ധതികളുടെ തറക്കല്ലിടലും ഉൽഘാടനങ്ങളുമായി മോദി തെരഞ്ഞെടുപ്പു പ്രചാരണത്തിലും. ഇന്ത്യയിലെ പ്രതിപക്ഷ പാർട്ടികളുടെ ദേശാഭിമാനവും രാജ്യത്തോടുള്ള കൂറും ബാലാക്കോട്ട് ആക്രമണവുമായി ബന്ധപ്പെടുത്തി തെരഞ്ഞെടുപ്പു നേട്ടം കൊയ്യാനുള്ള ധൃതിയിലാണ് അദ്ദേഹം. അഞ്ചുവർഷക്കാല ഭരണത്തിന്റെ അവസാന മന്ത്രിസഭായോഗം വ്യാഴാഴ്ചയാണ് ചേർന്നത്. സമ്മതിദായകരെ സ്വാധീനിക്കാനുള്ള തീരുമാനങ്ങളാണ് അതിലും എടുത്തത്.

അയോദ്ധ്യാ തർക്കഭൂമിപ്രശ്നം വെള്ളിയാഴ്ച സുപ്രിം കോടതി മൂന്നംഗ മാദ്ധ്യസ്ഥ സമിതിക്ക് വിട്ടു. ഇത് മോദിയുടെയും ബി.ജെ.പിയുടെയും തെരഞ്ഞെടുപ്പിലെ തീവ്രഹിന്ദുത്വ അജണ്ടയ്ക്ക് അപ്രതീക്ഷിത പ്രഹരമായി. ഏഴു പതിറ്റാണ്ടായി ഹിന്ദുക്കളും മുസ്്ലിങ്ങളും തമ്മിൽ നിലനിൽക്കുന്ന അയോദ്ധ്യയിലെ തർക്കഭൂമി പ്രശ്നത്തിൽ ഒത്തുതീർപ്പു ദൗത്യത്തിന് എട്ടാഴ്ചയാണ് സുപ്രിം കോടതി സമയം നൽകിയിട്ടുള്ളത്. ജസ്റ്റിസ് ഖലീഫുള്ള അദ്ധ്യക്ഷനായ മൂന്നംഗ സമിതിയിൽ ശ്രീശ്രീ രവിശങ്കർ, മുതിർന്ന അഭിഭാഷകൻ ശ്രീറാം പഞ്ചു എന്നിവരാണ് മറ്റു രണ്ടുപേർ.

ദീർഘകാലമായി തുടരുന്ന, രണ്ടു സമുദായങ്ങളെയും രാജ്യത്തെയും ഏറെ വൈകാരികമായി ബാധിക്കുന്ന ഈ കേസിലെ ഇരു കക്ഷികളും യോജിച്ചാലേ മാദ്ധ്യസ്ഥം വിജയിക്കൂ. മുസ്്ലിം സംഘടനകൾ കോടതി തീരുമാനം സ്വാഗതം ചെയ്തപ്പോൾ ഹിന്ദുത്വ വക്താക്കളിൽനിന്നുള്ള പ്രതികരണം മറിച്ചാണ്.

തൽക്കാലം ലോക് സഭാ തെരഞ്ഞെടുപ്പിൽ തീവ്രഹിന്ദുത്വ അജണ്ടയായി അയോദ്ധ്യയിലെ ശ്രീരാമക്ഷേത്ര നിർമ്മാണപ്രശ്നം ആളികത്തിക്കാനുള്ള മോദിയുടെയും ആർ.എസ്.എസിന്റെയും രാഷ്ട്രീയ അജണ്ട സുപ്രിം കോടതി തീരുമാനത്തോടെ അപ്രതീക്ഷിതമായി കാറ്റെടുത്തിരിക്കുകയാണ്. സുപ്രിം കോടതി കേസ് നീട്ടിക്കൊണ്ടു പോകുകയാണെന്നു പറഞ്ഞ് കേന്ദ്ര നിയമമന്ത്രിയും യു.പി മുഖ്യമന്ത്രി യോഗി ആദിത്യനാഥും ഹിന്ദു സംഘടനകളും ഭീഷണി മുഴക്കിയിരുന്നു.

പുൽവാമയിലെ ഭീകരാക്രമണം, ഇന്ത്യൻ വ്യോമസേന ബാലാക്കോട്ട് നടത്തിയ പ്രത്യാക്രമണം, പാകിസ്താന്റെ വ്യോമാക്രമണ ശ്രമത്തെ തിരിച്ചടിച്ച ഇന്ത്യൻ പ്രതിരോധം – ഇതെല്ലാം സമീപദിവസങ്ങളിൽ രാജ്യം ഒറ്റക്കെട്ടായി നേരിട്ട സംഭവങ്ങളാണ്. എന്നാൽ പ്രധാനമന്ത്രി മോദി ചരിത്രത്തിലാദ്യമായി സൈനിക നടപടി തെരഞ്ഞെടുപ്പ് അജണ്ടയാക്കാനും രാഷ്ട്രീയമായി മുതലെടുക്കാനും ശ്രമിച്ചു. പ്രതിപക്ഷം സേനയ്‌ക്കൊപ്പമാണോ പാകിസ്താനൊപ്പമാണോ എന്ന ചോദ്യമുയർത്തി ഹിന്ദുത്വ ദേശീയതയുടെ പേരിൽ വീണ്ടും തെരഞ്ഞെടുപ്പിൽ ജനങ്ങളെ ഭിന്നിപ്പിക്കാൻ ശ്രമിക്കുന്നു. അതിലേറെ, റഫാൽ ഉടമ്പടിയും ഇതുമായി കൂട്ടിക്കെട്ടി: 'റഫാലിന്റെ കുറവ് ഇന്ന് രാജ്യം അനുഭവിച്ചു. നമ്മുടെ കൈയിൽ റഫാൽ ഉണ്ടായിരുന്നെങ്കിൽ എന്ന് ഇന്ന് രാജ്യം ഒരേ സ്വരത്തിൽ ചോദിക്കുകയാണ്. ആദ്യം സ്വാർത്ഥനീതി കാരണവും ഇപ്പോൾ രാഷ്ട്രീയപാർട്ടികൾ കാരണവും രാജ്യത്തിനു നഷ്ടമുണ്ടായി' എന്ന് പ്രധാനമന്ത്രി കുറ്റപ്പെടുത്തി.

പ്രധാനമന്ത്രിയെപ്പോലൊരാൾ നാടാകെ പാറിനടന്ന് ഇങ്ങനെ നുണപറയുന്നു എന്നത് ആശ്ചര്യജനകം മാത്രമല്ല അസഹ്യവുമാണ്. റഫാൽ ഇടപാട് സംബന്ധിച്ച് പാർലമെന്റിന്റെ സമാപന ദിവസത്തിൽ സി.എ.ജി സമർപ്പിച്ച റിപ്പോർട്ടിൽ പറയുന്നത് വാജ്‌പേയി ഗവണ്മെന്റ് 2000 മുതൽ 2004വരെ റഫാൽ ഇടപാട് വച്ചു താമസിപ്പിച്ചു എന്നാണ്. അവസാന ടെൻഡർ തീരുമാനിച്ചത് യു.പി.എ ഗവണ്മെന്റിന്റെ സമയത്താണെന്നും. കരാറിന് അവസാന രൂപംനൽകാൻ ശ്രമിച്ചപ്പോൾ അതിൽ ക്രമക്കേടുകൾ ഉണ്ടായിട്ടുണ്ടെന്ന് പരാതി നൽകിയത് ബി.ജെ.പി നേതാക്കളായ യശ്വന്ത് സിൻഹയും സുബ്രഹ്മണ്യ സ്വാമിയുമായിരുന്നു. കരാർ കൂടിയാലോചനാ സമിതിയിലെ മൂന്ന് അംഗങ്ങളും ക്രമക്കേടുകളുണ്ടെന്ന് ചൂണ്ടിക്കാട്ടി. ഇതേതുടർന്നാണ് യു.പി.എ ഗവണ്മെന്റ് ഇടപാടിൽ ആരോപിക്കപ്പെട്ട ക്രമക്കേട് അന്വേഷിക്കാൻ ഒരു ഉന്നതതല സമിതിയെ നിയോഗിച്ചത്. അതിന്റെ റിപ്പോർട്ട് 2015 മാർച്ച് 27ന് പ്രധാനമന്ത്രി മോദിക്കാണ് സമർപ്പിച്ചത്. അത് അവഗണിച്ചാണ് മോദി നേരിട്ട് ഫ്രഞ്ച് പ്രസിഡന്റുമായി ചർച്ച നടത്തി കരാർ ഒപ്പിട്ടത്. 2016 സെപ്റ്റംബർ 23ന് കരാർ ഒപ്പുവെച്ചിട്ടും 2019ൽ പാക് വ്യോമാക്രമണത്തെ നേരിടാൻ ഒരു റഫാൽ വിമാനംപോലും കൈവശമില്ലാതെ പോയതിന് പ്രധാനമന്ത്രി മോദി ആരെയാണ് കുറ്റപ്പെടുത്തുക.

റഫാൽ വിമാന ഇടപാടു സംബന്ധിച്ച കേസിൽ പുനർവിചാരണാ നടപടികൾ മോദിക്ക് തിരിച്ചടിയാകുന്നതും സുപ്രിം കോടതിയിൽ ബുധനാഴ്ച കണ്ടു. മുമ്പ് ബൊഫോഴ്‌സ് ഇടപാടിലെന്നപോലെ പ്രശസ്ത പത്രപ്രവർത്തകൻ എൻ റാം 'ഹിന്ദു' പത്രത്തിലൂടെ റഫാൽ ഇടപാട് സംബന്ധിച്ച് തുടരുന്ന വെളിപ്പെടുത്തലുകളും രാജ്യതാല്പര്യത്തിനെതിരാണെന്ന് സുപ്രിംകോടതിയിൽ അറ്റോർണി ജനറൽ പറഞ്ഞു.

അതിർത്തി സംഘർഷത്തെ തുടർന്ന് വർദ്ധിച്ചുവെന്ന് അവകാശപ്പെടുന്ന പ്രധാനമന്ത്രിയുടെ പ്രതിച്ഛായയെ കാര്യമായി ബാധിക്കുന്ന സംഭവങ്ങളാണിവ. സുപ്രിം കോടതിക്കു മുമ്പിലെ പുനർവിചാരണാ ഹർജികളിൽ സമർപ്പിച്ച രേഖകൾ രാജ്യരക്ഷാ മന്ത്രാലയത്തിൽനിന്ന് മോഷ്ടിച്ചതാണെന്നും ഹർജി തള്ളണമെന്നുമാണ് കോടതിയോട് അറ്റോർണി ജനറൽ കെ.കെ വേണുഗോപാൽ ആവശ്യപ്പെട്ടത്. ഈ രേഖകൾ പ്രസിദ്ധീകരിച്ച എൻ റാമിനും 'ഹിന്ദു' പത്രത്തിനുമെതിരെ ഔദ്യോഗിക രഹസ്യനിയമപ്രകാരം അന്വേഷണ നടപടികൾ ആരംഭിച്ചതായും അദ്ദേഹം പറഞ്ഞു.

സുപ്രിം കോടതിയിൽ സ്വീകരിച്ച ഈ നിലപാടിലൂടെ മോദി സർക്കാർ അംഗീകരിക്കുന്നത് റഫാൽ ഇടപാടിലെ യഥാർത്ഥ രേഖകളാണ് പുറത്തായതെന്നാണ്. ഇടപാടിൽ മോദി സർക്കാറിന് ക്ലീൻചിറ്റ് നൽകിയ സുപ്രിം കോടതിയിലും പുനർവിചാരണയ്ക്ക് സമർപ്പിച്ചത് അതേ രേഖകളാണെന്നാണ്. ഈ രേഖകളെ ആശ്രയിച്ചുള്ള റാമിന്റെ 'ഹിന്ദു'വിലെ അന്വേഷണാത്മക റിപ്പോർട്ടിലെ വസ്തുതകൾ യഥാർത്ഥമാണെന്നാണ് അറ്റോർണി ജനറൽ പറയാതെ പറയുന്നത്.

ഇതോടെ പ്രധാനമന്ത്രിയും സുപ്രിം കോടതിയുടെ റഫാൽ വിധിയും പാർലമെന്റ് പിരിയുന്ന ദിവസം ലോക് സഭയുടെ മേശപ്പുറത്തുവെച്ച റഫാൽ ഇടപാടു സംബന്ധിച്ച സി.എ.ജി റിപ്പോർട്ടും റഫാൽ ഇടപാട് ലാഭകരവും തൃപ്തികരവുമാണെന്നുള്ള അവരുടെ നിഗമനത്തെ ഒരുപോലെ ചോദ്യംചെയ്യുന്നു. മനോഹർ പരീക്കറുടെ രാജ്യരക്ഷാ മന്ത്രാലയം നിയോഗിച്ച റഫാൽ സംബന്ധിച്ച കൂടിയാലോചനാ കമ്മറ്റിയുടെ അന്തിമറിപ്പോർട്ടാണ് പുറത്തുവന്ന രേഖ.

തിടുക്കപ്പെട്ട് ഫ്രാൻസിൽനിന്ന് 36 റഫാൽ വിമാനങ്ങൾ മോദി നേരിട്ട് കരാറാക്കിയതിൽ കോടികളുടെ അധികച്ചെലവുണ്ടായെന്നാണ് രേഖ വെളിപ്പെടുത്തുന്നത്. നിയമമന്ത്രാലയവും ഇന്ത്യൻ കൂടിയാലോചനാ സംഘവും ആവർത്തിച്ച് ആവശ്യപ്പെട്ടിട്ടും ബാങ്ക് ഗ്യാരണ്ടി നൽകാൻ ഫ്രാൻസ് തയ്യാറാകാത്തത് വിമാനവില കൂട്ടി. ഔദ്യോഗിക കൂടിയാലോചനാ സമിതിക്ക് സമാന്തരമായി പ്രധാനമന്ത്രിയുടെ ഓഫീസ് നടത്തിയ കൂടിയാലോചനകളാണ് ഇതിന് കാരണമായതെന്ന് പ്രസ്തുത രേഖ വിശദീകരിക്കുന്നു. പ്രധാനമന്ത്രി മോദിയും ദേശീയ സുരക്ഷാ ഉപദേഷ്ടാവ് അജിത് ഡോവലും ആണ് യു.പി.എ ഗവണ്മെന്റിന്റെ കാലത്ത് മുന്നോട്ടുവച്ച നിർദ്ദേശങ്ങളെ അട്ടിമറിച്ച് ദസൊ വിമാനനിർമ്മാണ കമ്പനിയ്ക്ക് വൻ ലാഭമുണ്ടാക്കിയതെന്ന് ഇതോടെ വെളിപ്പെടുന്നു.

ബൊഫോഴ്‌സ് ആയുധ ഇടപാടിൽ ഔദ്യോഗിക രഹസ്യനിയമം ബാധകമല്ലേ എന്ന് സുപ്രിംകോടതി അറ്റോർണി ജനറലിനോട് ചോദിച്ചു. ഔദ്യോഗിക രേഖകൾ എന്തുകൊണ്ട് കോടതിക്കു പരിശോധിച്ചുകൂടാ? അഴിമതി പ്രശ്‌നത്തിൽ സർക്കാറിന് ഔദ്യോഗിക രഹസ്യനിയമത്തിന്റെ മറയിൽ രക്ഷപ്പെടാനാകുമോ?

പുനർവിചാരണാ ഹർജി തള്ളാൻ അവസാന കയ്യായി പ്രയോഗിച്ച ഔദ്യോഗിക രഹസ്യനിയമമെന്ന ഇമ്പാച്ചി സുപ്രിം കോടതിപോലും മുഖവിലയ്‌ക്കെടുത്തില്ല. മാദ്ധ്യമങ്ങളുടെ നാവ് സർക്കാർ വരിഞ്ഞുകെട്ടുകയാണെന്ന് പത്രാധിപ സംഘടനയായ എഡിറ്റേഴ്‌സ് ഗിൽഡും പ്രതിപക്ഷ നേതാക്കളും അതിശക്തമായി കുറ്റപ്പെടുത്തി. ഗതിയില്ലാതെ വെള്ളിയാഴ്ച അറ്റോർണി ജനറൽ തിരുത്തിപ്പറഞ്ഞു: രാജ്യരക്ഷാ വകുപ്പിൽനിന്ന് രേഖ മോഷണംപോയിട്ടില്ലെന്നു!

മുതിർന്ന അഭിഭാഷകൻ പ്രശാന്ത് ഭൂഷൺ, വാജ്‌പേയി മന്ത്രിസഭയിലെ അംഗങ്ങളായ യശ്വന്ത് സിൻഹ, അരുൺ ഷൂരി, ആം ആദ്മി പാർട്ടിയുടെ സഞ്ജയ് സിങ് എം.പി എന്നിവർ നൽകിയ പുനഃപരിശോധനാ ഹർജി മാർച്ച് 14ന് വീണ്ടും സുപ്രിം കോടതി മുമ്പാകെ വരും.

ബാലാക്കോട്ട് വിഷയത്തിലും വ്യോമസേനയെ ആരും സംശയിക്കുന്നില്ല. വ്യോമാക്രമണം കഴിഞ്ഞ് സ്ഥലത്തെത്തിയ റോയ്‌ട്ടേഴ്‌സ് ലേഖകരും പ്ലാനറ്റ് ലാബ്‌സ് എടുത്ത ഉപഗ്രഹ ചിത്രങ്ങളും വ്യക്തമാക്കുന്നത് ഇന്ത്യ അവകാശപ്പെട്ടതുപോലെ ഭീകരുടെ പരിശീലനകേന്ദ്രത്തിലെ കെട്ടിടങ്ങൾ തകർന്നിട്ടില്ലെന്നാണ്. വിദേശകാര്യ മന്ത്രാലയത്തിനും പ്രതിരോധ മന്ത്രാലയത്തിനും ഉപഗ്രഹചിത്രങ്ങൾ ചൂണ്ടിക്കാട്ടി റോയ്‌ട്ടേഴ്‌സ് സന്ദേശം അയച്ചിട്ടും പ്രതികരിച്ചിട്ടുമില്ല.

വ്യോമസേനാ മേധാവികളുടെ നിലപാട് വ്യക്തവും നൂറുശതമാനം വിശ്വസനീയവുമാണ്. തങ്ങളെ ഏല്പിച്ച ലക്ഷ്യം നൂറുശതമാനവും ആക്രമിച്ചു നശിപ്പിച്ചെന്നതാണ് അവരുടെ നിലപാട്. അവിടെ ആളുകളുണ്ടായിരുന്നോ, എത്രപേർ മരണപ്പെട്ടു എന്നതൊന്നും വ്യോമസേനയുടെ ദൗത്യത്തിൽപെട്ടതല്ല. രഹസ്യ ഏജൻസികളുടെ നിരീക്ഷണ റിപ്പോർട്ടിന്റെ അടിസ്ഥാനത്തിൽ ഭീകരകേന്ദ്രങ്ങൾ എന്ന നിലയിൽ അടയാളപ്പെടുത്തിയ കേന്ദ്രങ്ങൾ പിഴച്ചുപോയെങ്കിൽ അത് വ്യോമസേനയുടെ തെറ്റോ പരാജയമോ അല്ല. ഏല്പിച്ച ദൗത്യം നിറവേറ്റി തിരിച്ചെത്തുക മാത്രമാണ് അവരുടെ ചുമതല. കൊല്ലപ്പെട്ട ഭീകരരുടെ കണക്ക് രാജ്യരക്ഷാ മന്ത്രാലയത്തിന്റേതുമല്ല. ബി.ജെ.പി അദ്ധ്യക്ഷൻ അമിത് ഷാ മുതലുള്ളവരാണ് കൊല്ലപ്പെട്ടവരുടെ എണ്ണം 250ഉം 300ഉം മറ്റുമായി അവതരിപ്പിച്ചത്.ഇതേക്കുറിച്ചുയരുന്ന സംശയങ്ങൾ ചൂണ്ടിക്കാട്ടുകയാണ് സ്വാഭാവികമായും പ്രതിപക്ഷവും മാദ്ധ്യമങ്ങളും ചെയ്യുന്നത്. വിശേഷിച്ചും പ്രധാനമന്ത്രിയും ഭരണകക്ഷിയും അത് തെരഞ്ഞെടുപ്പു വിഷയമായി ഉയർത്തുമ്പോൾ. സംശയങ്ങൾക്കു മറുപടി പറയുന്നതിനു പകരം അതിർത്തി കാക്കുന്ന സൈന്യത്തെ പ്രതിപക്ഷം മോദിയെപ്പോലെ അവിശ്വസിക്കുകയും വെറുക്കുകയുമാണെന്നാണ് പ്രധാനമന്ത്രി അധിക്ഷേപിക്കുന്നത്.

പ്രധാനമന്ത്രിക്കു നേരെയുള്ള ചോദ്യങ്ങൾ കൂടുതൽ വ്യാപകമാകാൻ പോകുന്നു. ഔദ്യോഗിക രഹസ്യനിയമം അനുസരിച്ച് കേസ് എടുത്തതുകൊണ്ടോ ദേശസ്നേഹം സ്വന്തം കുത്തകയായി ഉയർത്തിക്കാണിച്ചതു കൊണ്ടോ ചോദ്യങ്ങളെ തടയാനാവില്ല. റഫാൽ കേസിലെ പുനഃപരിശോധനാ ഹർജി അടുത്തയാഴ്ച വീണ്ടും സുപ്രിം കോടതിയിൽ വാദത്തിന് വരും. പ്രധാനമന്ത്രി മോദിതന്നെ ഇപ്പോൾ കടന്നാക്രമണത്തിൽനിന്ന് പ്രതിരോധത്തിലേക്കു പിന്മാറിത്തുടങ്ങി. കഴിഞ്ഞദിവസം അദ്ദേഹം പറഞ്ഞു: അവരെല്ലാം ചേർന്ന് ഇപ്പോഴെന്നെ അപമാനിക്കുകയാണ്. പക്ഷെ, ഞാൻ ഉറപ്പുനൽകുന്നു നിങ്ങളുടെ ഈ ചൗക്കീദാർ (കാവൽക്കാരൻ) മുമ്പെന്നപോലെ ഇപ്പോഴും ജാഗ്രതയിലാണ്.തൊട്ടുപിന്നാലെയാണ് അറ്റോർണി ജനറൽ സുപ്രിം കോടതിയിലെത്തി പറഞ്ഞത്: 'രക്ഷാ മന്ത്രാലയത്തിലെ അതിരഹസ്യരേഖകൾ മോഷണം പോയിരിക്കുന്നു.' ഇപ്പോൾ അദ്ദേഹം തിരുത്തുന്നു: കരാറിന്റെ അസ്സൽ അവിടെത്തന്നെയുണ്ട്. പകർപ്പുമാത്രമാണ് നഷ്ടമായത്!

'ഒരാളുടെ വാക്ക് ഒരാളുടെയും ഉറപ്പല്ല. നാം നിശ്ശബ്ദമായി ഇരുപക്ഷത്തേയും കേൾക്കേണ്ടതുണ്ട്.' – ഗെയ്‌ഥേ

കടപ്പാട്:വള്ളിക്കുന്ന് ഓൺലൈൻ

Read More >>