കുസൃതി കുടുക്കകൾ ഹാംസ്റ്ററുകൾ

Published On: 2018-08-02 08:30:00.0
കുസൃതി കുടുക്കകൾ ഹാംസ്റ്ററുകൾ

വെബ്ഡെസ്ക്ക്: കാണാന്‍ കൗതുകമുള്ള വര്‍ണ എലികളാണ് ഹാംസ്റ്ററുകൾ. മനുഷ്യരോട് വളരെയധികം ഇണങ്ങി ജീവിക്കുന്നു എന്നതും ഇവയുടെ പ്രത്യേകതകളാണ്. സ്വയംതൊഴില്‍ തേടുന്നവര്‍ക്കും കര്‍ഷകര്‍ക്കും കുറഞ്ഞ മുതല്‍മുടക്കില്‍ കൂടുതല്‍ വരുമാനം നേടാന്‍ സ്വീകരിക്കാവുന്ന ഉപജീവനമാര്‍ഗം കൂടിയാണ് ഹാംസ്റ്റര്‍ വളര്‍ത്തല്‍.

അലങ്കാരജീവികളായി വീടുകളില്‍ കൂടുകളിലും അക്വേറിയങ്ങളിലും ഗ്ലാസ് ഭരണികളിലും ഇവയെ വളര്‍ത്താം. സൗമ്യശീലവും വര്‍ണഭംഗിയും നിറഞ്ഞ ഹാംസ്റ്ററുകള്‍ക്ക് ആവശ്യക്കാരേറെയാണ് . 800 രൂപ മുതല്‍ 4000 രൂപ വരെയാണ് വില. പരിപാലനച്ചെലവ് കുറവ്, കൂടിയ രോഗപ്രതിരോധശേഷി, കുറഞ്ഞ പരിപാലനസ്ഥലം എന്നിവകൊണ്ട് വീട്ടമ്മമാര്‍ക്ക് വീടുകളിലും ഹാംസ്റ്ററുകളെ വളര്‍ത്തി വരുമാനം കണ്ടെത്താനാകും.

പരിപാലനത്തിന് പ്രത്യേക ചെലവും പരിചരണവും ആവശ്യമില്ലെന്നതാണ് ഹാംസ്റ്റര്‍ വളര്‍ത്തലിന്റെ പ്രധാന ആകര്‍ഷണം. വീടുകളിലെ മുറികളില്‍പ്പോലും ഇവയെ വില്പനാവശ്യങ്ങള്‍ക്കായി വളര്‍ത്താം. പണം ചെലവഴിച്ച് കൂടൊരുക്കാന്‍ സാധിച്ചില്ലെങ്കില്‍ ബക്കറ്റുകളില്‍ പോലും വളര്‍ത്താം. അറക്കപ്പൊടി, മരചിപ്ലി, ഉണങ്ങിയ മണല്‍, പേപ്പര്‍ കഷണങ്ങള്‍ എന്നിവ നിറച്ച് വളര്‍ത്തുനിലമൊരുക്കാം. വളരുന്ന ചുറ്റുപാട് വൃത്തിയായി സൂക്ഷിക്കുന്ന സ്വഭാവമുള്ളതിനാല്‍ മുറികളില്‍ വളര്‍ത്തുമ്പോള്‍പ്പോലും ദുര്‍ഗന്ധം ഉണ്ടാകില്ല.

റഷ്യന്‍-ചൈനീസ് വംശജരായ ഇവയെ വെള്ള, ചാരം, ലൈറ്റ് ക്രീം, കറുപ്പ്, ഇടകലര്‍ന്ന നിറങ്ങള്‍ എന്നിങ്ങനെയാണ് കണ്ടുവരാറ്. ചുവന്ന കണ്ണുകളോട് കൂടിയ വെള്ളനിറമുള്ളവയ്ക്കാണ് ആവശ്യക്കാര്‍ കൂടുതല്‍.

ഭക്ഷണം ഏതൊക്കെ

നെല്ല്, സണ്‍ഫ്ലവര്‍, ചോളം, പയര്‍, കുതിര്‍ത്ത കടല, മമ്പയര്‍, സോയാബീന്‍, ചെറുപയര്‍, ഉഴുന്ന് തവിട്, എള്ള് പിണ്ണാക്ക്, ആപ്പിള്‍, കാരറ്റ്, ബീറ്റ്‌റൂട്ട്, പേരക്ക, മുട്ടയുടെ വെള്ളക്കരു, ഗോതമ്പ്, കടലപ്പിണ്ണാക്ക് തുടങ്ങി വീടുകളില്‍ ലഭ്യമായവ എന്തും ഇവയ്ക്ക് ഭക്ഷണമായി നല്‍കാം.

പ്രജനനം: ഗര്‍ഭകാലം

ഗര്‍ഭിണിയായാല്‍ പ്രത്യേക കൂട്ടിലേക്ക് മാറ്റുന്നതും നല്ലതാണ്. 18 മുതല്‍ 21 ദിവസം വരെയാണ് ഗര്‍ഭകാലം. വര്‍ഷത്തില്‍ ആറ് മുതല്‍ ഏഴ് പ്രസവങ്ങള്‍ വരെ നടക്കും. ഒരു പ്രസവത്തില്‍ മൂന്ന് മുതല്‍ 12 കുഞ്ഞുങ്ങളെ ലഭിക്കും. ഇതില്‍ എട്ടെണ്ണത്തെ വരെ ആരോഗ്യത്തോടെ ലഭിക്കും. ആരോഗ്യം കുറഞ്ഞവയെ തള്ളതന്നെ ആഹാരമാക്കും. പ്രസവം കഴിഞ്ഞ് ആരോഗ്യം വീണ്ടെടുത്താലുടന്‍ അടുത്ത ബ്രീഡിങ്ങിനായി ഒരുക്കാം.

Top Stories
Share it
Top