വര്‍ഗീയ ധ്രുവീകരണത്തിന് 1000 കോടി; കോബ്ര പോസ്റ്റിന്റെ ഓപ്പറേഷന്‍ 136ല്‍ കുടുങ്ങി മുൻനിര മാധ്യമങ്ങള്‍

Published On: 2018-05-25 12:15:00.0
വര്‍ഗീയ ധ്രുവീകരണത്തിന് 1000 കോടി; കോബ്ര പോസ്റ്റിന്റെ ഓപ്പറേഷന്‍ 136ല്‍ കുടുങ്ങി മുൻനിര മാധ്യമങ്ങള്‍

ന്യൂഡല്‍ഹി: രാജ്യത്ത് ഹിന്ദുത്വ വര്‍ഗീക ധ്രുവീകരണം നടത്താന്‍ 1000 കോടിരൂപ ആവശ്യപ്പെട്ട് പ്രമുഖ മാധ്യമസ്ഥാപനങ്ങള്‍. മുന്‍നിര ഓണ്‍ലൈന്‍ മാധ്യമമായ കോബ്ര പോസ്റ്റ് നടത്തിയ സ്റ്റിങ് ഓപ്പറേഷനിലാണ് ബിജെപിയ്ക്ക് വേണ്ടി രാജ്യത്ത് വര്‍ഗീയ ധ്രുവീകരണമുണ്ടാക്കുന്ന വാര്‍ത്തകള്‍ നല്‍കാന്‍ ഒരുക്കമാണെന്നും അതിന് കോഴയായി ആയിരം കോടിരൂപ വേണമെന്നും മാധ്യമസ്ഥാപന മേധാവികള്‍ ഉള്‍പ്പെടെയുള്ളവര്‍ സമ്മതിച്ചത്.

രാജ്യത്ത് വര്‍ഗീയ ധ്രുവീകരണം നടത്താന്‍ സഹായിക്കണമെന്ന് ആവശ്യപ്പെട്ട് പുഷ്പ ശര്‍മ്മ എന്ന മാധ്യമപ്രവര്‍ത്തകനാണ് വിവിധ മാധ്യമസ്ഥാപനങ്ങളെ സമീപിച്ചത്. ഇതിനായി 1000 കോടിരൂപവരെ നല്‍കാമെന്നും അദ്ദേഹം മാധ്യമസ്ഥാപനങ്ങളിലെ മുതിര്‍ന്ന ഉദ്യോഗസ്ഥരോടും സ്ഥാപനമേധാവിമാരോടും വിശ്വസിപ്പിച്ചു. ശ്രീമദ് ഭഗവത് ഗീതാ പ്രചാര്‍ സമിതി എന്ന സംഘടനയുടെ പ്രവര്‍ത്തകന്‍ എന്ന രൂപേണയാണ് ശര്‍മ്മ വിവിധ മാധ്യമസ്ഥാപനങ്ങളെ സമീപിച്ചത്.

ബിജെപിയ്ക്ക് വേണ്ടി വര്‍ഗീയ ധ്രുവീകരണം സൃഷ്ടിക്കുന്ന വാര്‍ത്തകള്‍ നല്‍കി അടുത്ത പെതുതെരഞ്ഞെടുപ്പില്‍ മോദിയെ വീണ്ടും അധികാരത്തിലെത്തിക്കാന്‍ സഹായിക്കണമെന്ന് ശര്‍മ്മ മാധ്യമസ്ഥാപനങ്ങളോട് ആവശ്യപെട്ടു. ശര്‍മ്മയുടെ ആവശ്യത്തിന് അനുകൂലമായ മറുപടിയാണ് മാധ്യമസ്ഥാപനങ്ങളുടെ ഉദ്യോഗസ്ഥരുടെയും മേധാവിമാരുടെയും ഭാഗത്ത് നിന്നുണ്ടായത്. ഇത്തരത്തില്‍ വര്‍ഗീയ ധ്രുവീകരണമുണ്ടാക്കുന്ന വാര്‍ത്ത നല്‍കാന്‍ കോഴ ആവശ്യപെടുന്നതും കോബ്ര പോസ്റ്റ് പുറത്തുവിട്ട ദൃശ്യത്തിലുണ്ട്.

കോബ്ര പോസറ്റ് മാര്‍ച്ചില്‍ പുറത്തവിട്ട ദൃശ്യങ്ങള്‍ക്ക് പിന്നാലെയാണ് രണ്ട് ഡസനിലേറെ വരുന്ന പുതിയ വീഡിയോകള്‍. മുന്‍നിരയിലുള്ളതും അല്ലാതതുമായ നിരവധി മാധ്യമസ്ഥാപനങ്ങളാണ് ഒളിക്യാമറ ഓപ്പറേഷനില്‍ കുടുങ്ങിയത്.

ടൈംസ് ഓഫ് ഇന്ത്യ, ഇന്ത്യാ ടുഡേ, സീ ന്യൂസ്, നെറ്റ്‌വര്‍ക്ക് 18, സ്റ്റാര്‍ ഇന്ത്യ, എബിപി ന്യൂസ്, ദൈനിക് ജാഗരണ്‍, ലോക്മത്, എബിപി ആന്ധ്ര ജ്യോതി, ടിവി 5, ദിനമലര്‍, എംവിടിവി, കെ ന്യൂസ്, ബിഗ് എഫ് എം, റേഡിയോ വണ്‍, റെഡ് എഫ് എം, ഇന്ത്യ വോയ്‌സ്, ഓപ്പണ്‍ മാഗസിന്‍, ഹിന്ദുസ്ഥാന്‍ ടൈംസ്, ന്യൂ ഇന്ത്യന്‍ എക്‌സ്പ്രസ്, ബര്‍ത്തമാന്‍ പത്രിക, ഭാരത് സമാചാര്‍, ദൈനിക് സബാദ്, സണ്‍ ടിവി, അമര്‍ ഉജ്വല, ഡിഎന്‍എ എന്നിവരുള്‍പ്പെട്ട വീഡിയോകളാണ് കോബ്ര പോസ്റ്റ് പുറത്തുവിട്ടത്.

അതേസമയം മുന്‍നിര ഹിന്ദി മാധ്യമസ്ഥാപനമായ ദൈനിക് ഭാസ്‌കര്‍ ഗ്രൂപ്പ് ഹിന്ദുത്വ ധ്രുവീകരണ വാര്‍ത്തകള്‍ പ്രിസിദ്ധീകരിക്കാമെന്ന് കോബ്ര പോസ്റ്റിന്റെ മാധ്യമപ്രവര്‍ത്തകന്‍ പുഷ്പ ശര്‍മയോട് സമ്മതിക്കുന്നുണ്ട്. ദൈനിക് ഭാസ്‌കര്‍ ഡല്‍ഹി ഹൈക്കോടതിയുടെ ഇന്‍ജങ്ഷന്‍ ഓര്‍ഡര്‍ വാങ്ങിയതിനാല്‍ ഈ ദൃശ്യങ്ങള്‍ പുറത്തുവിടുന്നത് താത്കാലികമായി കോബ്ര പോസ്റ്റ് മാറ്റിവച്ചു.

ലോകത്തില്‍ പത്രസ്വാതന്ത്ര്യത്തില്‍ ഇന്ത്യയുടെ സ്ഥാനം 136 ആണ്. ഇതിന്റെ പ്രതീകമായാണ് ഓപ്പറേഷന്‍ 136 എന്ന പേര് കോബ്ര പോസ്റ്റ് സ്റ്റിങ് ഓപ്പറേഷന് നല്‍കിയത്.

Top Stories
Share it
Top