ഒരു വയസുകാരിയെ ബലാത്സംഗം ചെയ്ത് തല നിലത്തടിച്ച് കൊന്നു

Published On: 2018-06-16 03:45:00.0
ഒരു വയസുകാരിയെ ബലാത്സംഗം ചെയ്ത് തല നിലത്തടിച്ച് കൊന്നു

പുണെ: രക്ഷിതാക്കള്‍ക്കൊപ്പം ഉറങ്ങിയ ഒരു വയസുകാരിയെ തട്ടികൊണ്ടുപോയി പീഡിപ്പിച്ച ശേഷം തല നിലത്തിടിച്ച് കൊലപ്പെടുത്തി. പുണെയിലെ ലോണി കല്‍ബോറില്‍ വ്യാഴാഴ്ച അര്‍ധരാത്രിയോടെയാണ് സംഭവം. സംഭവവുമായി ബന്ധപ്പെട്ട് മാല്‍ഹരി മന്‍സോദെ എന്ന 22 കാരനെ പൊലിസ് അറസ്റ്റ് ചെയ്തു.

ഇയാള്‍ കുഞ്ഞിനെ എടുത്തുകൊണ്ടുപോകുന്ന സി.സി.ടി.വി ദൃശ്യമാണ് പ്രതിയെ കണ്ടെത്താന്‍ പൊലീസിനെ സഹായിച്ചത്. തമിഴ്നാട്ടില്‍നിന്ന് കൂലിപ്പണിക്ക് പുണെയില്‍ എത്തിയവരാണ് പെണ്‍കുട്ടിയുടെ മാതാപിതാക്കള്‍.

ഉറങ്ങുകയായിരുന്ന കുഞ്ഞിനെ കാണാനില്ലെന്ന് തിരിച്ചറിഞ്ഞതോടെ മാതാപിതാക്കള്‍ ഉടന്‍തന്നെ തിരച്ചില്‍ തുടങ്ങുകയും പൊലിസില്‍ പരാതി കൊടുക്കുകയും ചെയ്തിരുന്നു. വെള്ളിയാഴ്ചയാണ് തിരച്ചിലിനിടെ സമീപപ്രദേശത്തുനിന്ന് കുഞ്ഞിന്റെ മൃതദേഹം കിട്ടിയത്.

വൈദ്യപരിശോധനയില്‍ കുഞ്ഞ് ലൈംഗികമായി പീഡിപ്പിക്കപ്പെട്ടിട്ടുണ്ടെന്നും തല നിലത്തിടിച്ചാണ് കൊല്ലപ്പെട്ടതെന്നും തെളിഞ്ഞു.

അന്വേഷണത്തിനിടെ സമീപത്തെ സി.സി.ടി.വി പരിശോധിച്ചപ്പോഴാണ് മന്‍സോദെയുടെ ദൃശ്യം ലഭിച്ചത്. തുടര്‍ന്ന് ഇയാളെ പിടികൂടി ചോദ്യം ചെയ്തപ്പോള്‍ പെണ്‍കുട്ടിയെ ബലാത്സംഗം ചെയ്തതായും ശേഷം തലനിലത്തടിച്ച് കൊലപ്പെടുത്തിയതായും സമ്മതിക്കുകയായിരുന്നു. പ്രതിക്കെതിരെ പോക്സോ പ്രകാരവും ഐപിസിയുടെ മറ്റ് വകുപ്പുകള്‍ പ്രകാരവും കേസ് രജിസ്റ്റര്‍ ചെയ്തിട്ടുണ്ട്.

Top Stories
Share it
Top